saaqii

mujh tak kab un kii bazm me.n aataa thaa daur-e-jaam saaqii ne kuchh milaa na diyaa ho sharaab me.n [Mirza Ghalib]     pilaa de ok se saaqii jo ham se nafrat hai pyaalaa gar nahii.n detaa na de sharaab to de [Mirza Ghalib]     mast kar ke mujhe auro.n ko lagaa muu.Nh saaqii ye karam hosh me.n rah kar nahii.n dekhe jaate [Ali Ahmed Jaleeli]     zikr-e-saaqii hii kaafii nahii.n ai 'Fana' be-piye maikade me.n guzaaraa nahii.n [Fana Nizami Kanpuri]     shaayad aa jayegaa saaqii ko taras ab ke baras mil na paayaa hai un aa.Nkho.n kaa ras ab ke baras [Rai Rampuri]     aa.Nkh ko jaam samajh baiThaa thaa anjaane me.n saaqiyaa hosh kahaa.N thaa tere diivaane me.n [Shamim Shahabadi]     ye rang-e-bahaar-e-aalam hai kyuu.N fikr hai tujh ko ai saaqii mahafil to terii suunii na hu_ii kuchh uTh bhii gaye kuchh aa bhii gaye [Majaz]     laa pilaa de saaqiyaa paimaanaa paimaane ke baad hosh kii baate.N karuu.Ngaa hosh me.n aane ke baad [Unknown]     tere shiishe me.n mai baaqii nahii.n hai bataa kyaa tuu meraa saaqii nahii.n hai samandar se mile pyaase ko shabanam bakhiilii hai ye razzaaqii nahii.n hai [Unknown]     saaqiyaa! saaqiyaa! saaqiyaa! saaqiyaa! raham kar, raham kar, raham kar, raham kar mai na de, mai na de, mai na de, mai na de ek nazar, ek nazar, ek nazar, ek nazar [Unknown]     tere nisaar saaqiiyaa jitanii piyuu.N pilaaye jaa mast nazar kaa vastaa mast mujhe banaaye jaa [Unknown]     ye alag baat hai saaqii ki mujhe hosh nahii.n hosh itanaa hai ki mai.n tujh se faraamosh nahii.n [Unknown]     baat saaqii kii na Taalii jaayegii kar ke taubaa to.D Daali jaayegii [Habib Jaleel]     ko_ii samajhaaye ki kyaa rang hai maiKhaane kaa aa.Nkh saaqii kii uThe naam ho paimaane kaa [Iqbal Sufipuri]     chashm-e-saaqii mujhe har gaam pe yaad aatii hai raastaa bhuul na jaa_uu.N kahii.n maiKhaane kaa [Iqbal Sufipuri]     mast karanaa hai to Khud muu.Nh se lagaa de saaqii tuu pilaayegii kahaa.N tak mujhe paimaane se [Jaleel Manikpuri]     sab kii nazaro.n me.n ho saaqii ye zaruurii hai magar sab pe saaqii kii nazar ho ye zaruurii to nahii.n [Khamosh Dehlvi]     saaqii kii har nigaah pe bal khaa ke pii gayaa laharo.n se khelataa huaa laharaa ke pii gayaa [Jigar Moradabadi]     fareb-e-saaqii-e-mahafil na puuchhiye "Majrooh" sharaab ek hai badale hue hai.n paimaane [Majrooh Sultanpuri]     saaqii nazar na aaye to gardan jhukaa ke dekh shiishe me.n maahataab hai sach bolataa huu.N mai.n [Unknown]     thii agar mai se suraahii terii Khaalii saaqii to chiraaG-e-dar-e-maiKhaanaa jalaayaa kyuu.N thaa [Unknown]     fazaa maGamuum hai saaqii uThaa chhalkaaye.n paimaanaa andheraa ba.Dh chalaa hai laa zaraa qandiil-e-maiKhaanaa [Unknown]     Dhal gayaa aaftaab ai saaqii laa pilaa de sharaab ai saaqii yaa suraahii lagaa mere muu.Nh se yaa ulaT de naqaab ai saaqii maikadaa chho.D kar kahaa.N jaa_uu.N hai zamaanaa Kharaab ai saaqii jaam bhar de gunaah_gaaro.n ke ye bhii hai ik savaab ai saaqii aaj piine de aur piine de kal kare.nge hisaab ai saaqii [Sudarshan Faakir]