ham mashriq ke musalamaano.n kaa dil maGrib me.n jaa aTakaa hai

Allama Iqbal

ham mashriq ke musalamaano.n kaa dil maGrib me.n jaa aTakaa hai
wahaa.N ku.ntar sab billorii hai, yahaa.N ek puraanaa maTakaa hai

[kuntar=glass; billori=crystal]

is daur me.n sab miT jaaye.nge, haa.N baaqii wo rah jaayegaa
jo qaayam apanii raah pe hai, aur pakkaa apanii haT kaa hai

[haT=maqsad]

ae shaiKh-o-brahman sunate ho kyaa ahl-e-basiirat kahate hai.n
gardo.n ne kitanii bula.ndii se un qaumo.n ko de paTakaa hai

[ahl-e-basiirat=witnesses; gardo.n=storms]